Кончина и прощальная грамота митрополита Киприана

Киприан, митрополит Киевский и Всея Руси, умер в 16 сентября 1406 г. в своей московской резиденции, митрополичьем селе Голинищеве.

Здесь приводится отрывок из Троицкой летописи под 6914 (1306) г., (Приселков М.Д. Троицкая летопись. Реконструкция текста. Спб, Наука, 2002). Сохранена орфография источника. Буквы «ять» и «фита» заменены соответственно русскими «е» и «ф».

Того же месяца септевріа въ 16 преставися пресвященныи митрополитъ Кіевскіи и всеа Русіи Кипріанъ, бывъ въ митрополитехъ 30 летъ безъ полутретья месяца. Проводиша же его честно весь градъ, и епископи служиша надъ нимъ: Григоріи Ростовскіи, Митрофанъ Суздалскіи, Ларіонъ Коломенскіи, архимандрити, игумени и весь съборъ священническыи, и певше надъ нимъ обычное надгробное пеніе, и положиша его въ соборнеи церкви святыя Богородица на Москве, на деснои стране въ стене. Бе же уже сеи въ старости велице и разболеся на Голенищеве, идеже бе поставилъ себе опришюю церковь, во имя Трехъ святитель, и любяше ту чясто приходити и пребывати на деле книжнаго писаніа. Бе бо место тихо и безмятежно и покоино; тамо же и разболеся. И преже преставленіа своего за четыре дни написа грамоту незнаему и страннолепну, яко прощалную, и аки въ образъ прощеніа, рекше всехъ благословляя и прощая, и отъ всехъ прощеніа и благословеніа требуя, иже мню яко конечнаго ради любомудріа и целомудриа, и си заповеда, отходя сего света епископомъ и сущимъ ту у него приставникомъ глаголя: «егда въ гробъ мя въкладая, тогда прочтите сію грамоту надъ мною въ слухъ людемъ», еже и бысть, еже и сътвори преподобныи епископъ Григоріи Ростовскіи и прочте ю велегласно, да услышана будеть въ уши всего народа; и внегда чтущу ему, тогда многы отъ предстоащихъ на слезы подвиже. Бе же грамота писана сице: «Во имя святыа и живоначалныа троица, азъ грешныи и смиренныи Кипріанъ митрополитъ смотрихъ, яко постиже мя старость, въпадохъ бо въ частыа и различныа болезни, имиже ныне съдръжимъ есмь, человеколюбне отъ бога казнимъ, греховъ моихъ ради; болезнемъ на мя умножившемся ныне, якоже иногда никогдаже и ничтоже ми възвещающи, ино разве смерть и страшныи спасовъ судъ, достоино разсудихъ, якоже въ завещаніи некая потребная мне отчасти писаніемъ симъ изъявити. Первое убо исповедую святую богопреданную апостольскую веру и православіа истинное благочестіе въ святую троицю и прочая апостольская священная повеленіа, святыя божіа церкве преданіа цела и неподвижима того благодатію съблюдати, якоже исповеданіемъ моимъ написанно то и предахъ, внегда вначале святитель рукополагахся по обычаю. И святымъ и благославнымъ и правовернымъ царемь христіанскымъ, и елици отъидоша сего житіа по моемъ поставленіи, и елици еще живи суть, всемъ вкупе подаю еже о святемъ дусе чистое прощеніе, къ симъ же и святеишимъ и вселенскимъ сущимъ патріархомъ, иже преже преставльшимся, и еще живущимъ. Тако же и священнеишимъ митрополитомъ всемъ преставльшимся, еще и живымъ, даю обычную любовь и последнее и конечное целованіе и прощеніе, и самъ того же прошу огь нихъ получити. Благородному же и христолюбивому о святемъ дусе възлюбленному сыну моему, великому князю Василію Дмитріевичю всеа Русіи даю миръ и благословеніе и последнее целованіе и сть его матерью, и съ его братьею, и съ его княгинею, и съ его детми, и съ ихъ княгинями, и съ ихъ детми. Такоже и всемъ великимъ княземъ рускымъ даю миръ и благословеніе и последнее целованіе и съ ихъ княгинями, и съ ихъ детми. Такоже и всемъ княземъ местнымъ съ княгинями и съ детми оставляю миръ и благословеніе. Такоже и боголюбивымъ епископомъ сущимъ подъ пределомъ нашіа церкви въ Русскои митрополіи, преже преставльшимся и еще живымъ сущимъ, даю имъ благословеніе и прощеніе и любовь, а отъ нихть того же прошю и самъ получити. Священноинокомъ же и всему священническому чину и елици у престола господня служать, всемъ даю прощеніе и благословеніе и любовь. Благочестивымъ же княземъ великимъ и малымъ и всемъ прочимъ, преже преставльшимся въ летехъ нашихъ, такоже даю прощеніе и благословеніе, и молюся господу богу да простить имъ вся съгрешеніа, елика и ти, яко человеци, съгрешиша. Бояромъ же великимъ и меншимъ и съ женами я съ детми ихъ, и всему христіанскому народу оставляю миръ и благословеніе имъ. Инокомь же всемъ вкупе, елици въ различныхъ местехъ живуть, и всему причту церковному миръ оставляю и благословеніе. Аще ли же буду кого въ епитемью вложилъ, или невниманіемъ или пакы благословною виною, а не будеть поискалъ разрешеніа, и въ томъ забытьи учинилася смерть, или кого училъ буду, а онъ ослушался, всехъ имею о святемъ дусе разрешены и прощены и благословены, и молюся человеколюбцу богу, да отпустить имъ. А понеже съчтохъ лета своя отнели въ митрополиты поставленъ быхъ, и обретеся числомъ, яко тридесятое лето течеть къ приходящему месяцу декамврію въ 2 день и толикимъ летомъ прошедшимъ, аще кто будеть поропталъ на мя или пакы явно въсталъ отъ епископьскаго сану или отъ иноческаго, еще же и священничьскаго, или кто и оть мирскихъ съвокупился будеть съ ними, и елици отъ нихъ познашася и пришедши къ мне исповедаша и пріаша прощеніе и разрешеніе прощени суть и благословени отъ того часа, и да не вменить имъ господь въ грехъ, но да отпустить имъ, а елици или стыдяся мене, или въ забытьи пріидоша, или въ небреженіи положиша, или опасаася мене, или за скудость имъ ума, или ожесточившися вражьимъ наветомъ, всякъ, иже есть отъ священникъ или отъ инокъ, или мирстіи мужескъ полъ и женескъ, да будуть прощени и благословени, и да не вменится имъ въ грехъ, зане то мое есть и въ мене преткнушася, и моея области то разрешити. Елици же възлюбиша насъ и помиловаша насъ, господа ради, въ нужахъ нашихъ и въ трудныихъ хоженіи нашихъ, и въ путехъ, и въ различныхъ въ земляхъ христоименитіи людіе, велможи, бояре, мужи и жены, да будуть и тіи прощени и благословени, и помиловани отъ бога человеколюбца, да въздастъ имъ господь по сердцу ихъ. А душу свою и домъ святыа богородица приказываю о святемъ дусе възлюбленному сыну своему, великому князю Василію Дмитреевичу всеа Русіи, како ся попечалуеть, такоже и бояръ своихъ, и слугъ своихъ, и молодыхъ людеи, отъ мала и до велика, какъ пожалуеть и поблюдеть. А миръ и благодать и прощеніе отъ господа бога нашего Ісуса христа съ всеми вами и мое благословеніе. А писана грамота сіа у трехъ святитель, месяца септевріа въ 12 день, индикта 15 лето 6915».