Послание митрополита Ионы к литовским епископам о непризнавании лжемитрополита Григория (Болгарина)

Текст приводится по изданию: Макарий (Булгаков), митрополит Московский и Коломенский. История Русской Церкви. Кн. 4. М., 1995 С. 535-541



«Благословение от пресвященнаго архиепископа Ионы, митрополита Киевскаго и всея Руси, о Святем Дусе възлюбленным сыновом и съслужебником нашего смерения, епископом земли Великие Литовьские, добре бывшим строителем святыа Церкве, правителем Божественнаго закона, благодать вам и мир, еже о Христе, святыя Церкве благоустроение.

Помните оубо, сынове, прежде бывшее, еже о мне смиреннем, како по милости Господа Бога Спаса нашего И. Христа и Пречистыя Его Матере, Святыя Богородица, аз смиреный епископ, быв преже Моуромский епископ и Рязанскиа земля, и колико лет пребывах в послушании духовне отца и господина своего, пресвященнаго архиепископа Фотея, митрополита Киевьскаго и всея Руси, о немже благоволи Бог приати душу его в Небесное Царство. И сиа весте, како изволи Бог и Пречистая Богородица, еже получити ми паству великиа Божиа Церкве и богосъбраннаго Христова великаго стада словесных овец. О сих же, чада, Бог весть, яко недръзновенне, ни самьвластне таковая створих, ниже о сих желательне душу имеях, но сие бысть действием Святаго Духа. И по сих с подвигом избранная и воли благочестию ревнителя, благовернаго великаго князя Василиа Василиевича, и достигох царствующаго града, цветущаго в прежнем благочестии греческаго православия, и приях от благовернаго царя и от святейшаго патриарха Иосифа благословение и от всего святаго Сбора Вселенскаго. И тако Божиею волею царь же и патриарх, по своему благословению и по всего святаго и Вселенскаго Збора, повелеша быти ми на Русстей земли по Сидоре митрополитом; зане оуже тогда от них поставлен бысть Сидор митрополит, и по сих пребысть на Руси немало время, и потом Рима достиг, и оттоле злая ерестная святей Церкви Русстей принесе неподобная, да и сам к Риму отбеже. И егда бысть по временех злоч[ес]тиваго Сидора ереснаго прихода, еже от Рима на Русскую митрополию, и паки, по отшествии его другаго пути к Риму, еже хождаше растояния ради святыя Церкве и развращениа ради православию злыми своими ересьми, въследуя прежним богоотступником Арию и Несторию. Видев же тогда сын нашь, князь великий, таковая Сидором нечестья бываема и остави его, яко безумна и отступника веры, и тако Божиею волею и Пречистыя Богородицы, духовне попечение имеяй еже о святей Церкви новый Владимир, благочестия ревнитель, и мудрый изыскатель святых правил богоуставнаго закона святых апостол и святых отец предания, и в благочестии цветый благоверный князь великий Василий Васильевич, вскоре о сих възвещая ми еже Сидором деемым, даже и о поставлении в своей земли митрополита по изысканию святых правил своея земля епископы, и обсылает о сих брата своего, короля и великого князя литовскаго, и тако прошенья волю о поставлени и грамоты его приим, и съзывает архиепископы и вся епископы великодръжавных земль своих Русские митрополии, ихже ныне имена суть на небесех написана в книгах животных. И створше Збор велик в церкви архангела Михаила в богоспасаемом граде Москве, и милостию Божиею и Пречистыя Его Матере, Святей Богородици, и по извещению Святаго Духа, и по изисканию святых правил Божественнаго закона, и по прежнему благословению царя же и святейшаго патриарха и всего их Вселенскаго святаго Збора греческаго великаго православия, и по начатью о Бозе действующаго благовернаго великаго князя Василия Василиевича, святыя его великыа Церкве дело благо и совершися еже о мне, паче же Богу споспешествующу. И бых свершен в Русстей земли митрополит Киевьский и всея Руси. Другаго же шествия долготы пути великаго не створихом, еже ко царствующему граду богоуставнаго закона, до царя же и патриарха не приидох, нужа ради путем великиа тесноты, насилованием множества от поганых; зане бо многих тогдашние земли Русские людей, великих гостей и шествующих тех путем, и побивше погании смерти предаша, а товара безчисленное множество разграбиша, и никому же тогда проити не дадуще семо же и овамо. К тому же еще и о сих известне увидехом, зане уже по грехом тогда прииде раскола и мятеж святей велицей зборней Церкви Гречестей с Римскою прелести ради богомерскаго Сидора, еже в Осмом си Зборе обольсти царя же и патриарха Греческаго и створи им, якоже иудеи Христу створиша, воздающе за манну желчь, за воду оцет, и распенша и Кресту пригвоздиша. Сидор же, прельстив царя и патриарха, разлучи от закона их святаго и погыбели исполни их. Богозданному же великому Царюграду, сами весте, како того ради смущения по малых временех от Бога попущенною казнью: многим волнением поганых язык людие православия сотрошася прелести ради вере православия греческаго и Сидорова деля развращениа. О такове бо апостоль, пиша, глаголеть: Аще кто разсыплет храм Божий, разсыплет того Бог.

Помните паки, сынове, и сиа: како аз, смереный, пришед в святую си церковь на Киеве, в великую дръжаву короля и великого князя литовскаго по уставу Божественнаго закона смеренней благочинне и по святым правилом имея богопорученное си строение и попечение, еже о святей Церкви и о уставлении приношениа святыа службы и о молитвенных предстояньих к Богу, еже о здравии и многолетствии самодръжавнаго короля и великого князя литовскаго, и о его благоверных князех, и болярех, и о всем православном христианстве вашее паствы Русские митрополии Киевские и Литовские земли. И бывал паки есмь неоднова тамо оуправлениа ради святыя Церкви, а не богатьства деля злата, ниже сребра, ни возмездиа ради почести, якоже он преже бывший Сидор, грабитель и враг церковный, татством их пограбив святую церковь Пречистые Богородици здесе на Москве, и поимал безчисленное множество злата церковнаго, а подкручя нас на путь неправды ко оставлению Осмаго си Збора, отреченнаго святыми правилы богоуставнаго закона прежнего православия греческаго, и заповедию святых апостол, и преданием святых отец богосъставленных святых седми Збор всея подсолнечныя, и утвердивше о сих добре и повелеша нам веровати в Святую и Животворящую и Единосущную Троицу, Отца и Сына и Святаго Духа. О Осмом же всея вселеныя Зборе заповедь тверду написавше, в святых правилех положиша, запрещающе зело, еже на такова никто же да не дръзает, ни съставляет, ниже покушается о сицевых делати же и творити, кроме особных дел, поместных си управлени церковных в своей земли митрополит с епископы своими или епископ в своей си Церкви с священники своими да створяют; а Осмому великому Збору вселеныя никакоже святая правила быти не повелевают и с проклятием отрицают. Сеятель же горкаго семени таковая сдела Сидор своею прелестию, якоже диавол, с нимже Григорей чернец, ученик его.

И сиа паки помните, сынове, како аз смиреный по Божественному закону не оставих вашего прошения и желания о Божественей пастве святыя Церкве, и тако по святым правилом дах вам освятение и благословение на главы ваша, и устроих вы церковнии правители, истиннии учители и яко добрии пастыри Христову стаду словесных овец. И ныне о сих тако же, сынове, благословляю вы. Господь Бог да управит о всем благочестне и законне по святым правилом путь честен вашея паствы, правление святыя Церкве и духовне съблюдение Христова стада словесных овець. И о таковых благочестьи добре подвизайтеся, якоже и мы, Божиею милостию и Пречистые Богородици. И сия весте сами, сынове и сослужебници нашего смерения, колико уже лет аз, смиренный, имеях великую паству, по Божественному закону правя и устрояя святую великую Церковь русскаго православьа по святым правилом, безмятежне и до днесь моля Бога и Пречистую Богородицю о здравии и многолетствии благовернаго великаго князя Василья Васильевича и сына его, благовернаго великаго князя Иоана Васильевича, и благовернаго князя Георгия Васильевича, и о всех благоверных князех, и болярех, и о всем великом господстве их великого благочестиа, яко да устроит Господь Бог в мире и тишине велице вся времена лет живота их. Ныне же, сынове и сослужебници нашего смерения, слышим пришедшаго к вам церковнаго врага, Сидорова ученика Григориа, черньца богомерзъскаго, и того ради пишу вам: блюдете опасне сих, да не възметет у вас богоотметный Григорей святыя Церкве, ниже лестью да не прострет сети змиевы, сатанины злыя ереси, ниже насеет греховнаго плевела ложнаго ученья, ни покрыет мьглою прелести развращения вере Божественнаго закона святых апостол. Вы бо сами приимше от нашего смирениа благословение и по святым правилом бысте богоизбранни правители святыя Церкви и истиннии оучители миру и проповедници вере благочестиа, да никако же не приимете его; сами бо весте преже бывшая злая нечестья их. Аз же ныне о сих пишу, вспоминая вам, како оубо Сидор и той чернец Григорей, ученик его, насытишася яду змиина, сатанины прелести, злыя ереси прежних богомерьзскых ересник и съставиша богоненавистны, отметны Збор Вселенски, сшедшеся во Флорентии, граде Римском, егоже Осмым нарекоша, и тако увязноувше в сети златолюбия. Якоже он злый раб и льстец, окаанный Юда, обият бысть мрежею сребролюбия и продасть Безценнаго, Емуже недостоить весь мир — тако же и Сидор истинную веру благочестиа на злате отдаваеть папе Римскому, и того ради незаконне почесть гордости бесовная взимаеть, и богоуставнаго закона православья веры отмещется, и тмою своего невериа покрывается. Егда же от Рима приде к нам и тако зваашеся легатос и от ребра апостольскаго седалища, лятьскаго же и немецкаго; егда же в молитвенных речениих святыя службы и вместо святых патриарх Вселенских поминает и блажит Сидор Евгения, папу Римскаго, о немже никогда же не приглашает святая Церкви нашего православиа; с Сидором же и чернець его той и диакон Григорей, ученик его, единосложно таковая согласують и следующе способником своим богомерзъскаго их Збора отреченнаго, ихже не приемлет святая Церкве православиа и зело отрицает. Егда же бысть, по скончании святыя службы тако повеле Сидор, став посреде церкви чести велегласно богомерзъскаго си Осмаго вселеныя Збора отреченнаго святыми правилы, еже сдела грамоту, в нейже писано есть разделение о Святей Троици, согласующе, яко от Сына Дух исходит, и опресночная нам съединиша приношения в святей службе святыя Церкве. Сидор же с Григорием, вкупе блядовьствующе, о сих добре похваляют и ина богомерзъская, богоотметная многа, еже святей Церкви развращенная, глаголаху. Святая же великая наша Божия Церкви русскаго благочестия дръжит святая правила и Божественный закон святых апостол и устав святых отец, еже приа преже бывшия святыя великия зборныя Церкви богозданнаго царствующаго града великаго православья греческаго, прежнего богооуставнаго благочестиа, от неяже преже бывшии митрополити Русстии устраяли и управляли святую Церковь русскаго благочестия безмятежне и того ради от Бога венци святыми венчашася и великих чюдес сподобишася. Святый Петр митрополит, Алексей митрополит церковнии правители быша, истиннии учители благочестиа, и к Богу отъидоша еже по смерти, и до ныне чюдеса творят Божиею волею, ихже молитвами и мы сподобихомся от Бога прияти правление святыя си Церкви в Роустей земли восиявшаго благочестия и паству великаго, богоизбраннаго Христова стада словесных овец, в немже и пребываем благочестьи прежнем, доколе Бог велит. Егда же узре благоразумный князь великий Василий Васильевичь в Божией Церкви великаго си благочестиа неудобь делаемо Сидором развращение святей Церкви, благочестию их великому, православию Рускиа земля, и тако повелевает тогда побыти ему во обчем монастыри великаго архангела Михаила, донеле же пошлет до царствующаго града ко царю, и патриарху, и ко всему Збору православиа о Сидоре, да увесть от них: что ради бысть сицево развращение от него святей Церкви злыми ересми. Сидор же тогда бесуяся и тако нимало времени пождати не стерпе срама ради обличения своего о злых ересех, еже делаше и тмою своего безверия оболъкся, нощию бездверием изшед, татством бегу ятся и со оучеником своимь Григорием с чернцем. Благоверный же князь велики Василий Васильевичь не посла за ним възвратити его, ни въсхоте дръжати его, яко несмыслена и богомерзъска, да не приступится греси его, зане бо святая правила Божественнаго закона святых апостол повелевают таковаго Церкви развратника огнем сжещи или живого в землю засыпати.

Сидор же, о таковых своих ересех ничто же приим зла, к Риму отбеже, и ныне отдалеча Сидор таже творить, яко же злый, пагубный змий диавол, жестоко гоня святую Церковь, развращая русскаго благочестия, и вводит ныне от Римскаго папы митрополитом на Русь черньца Григорья, богоотметнаго ученика своего, таковаго же с ним богомерзъскаго и тмокровных ересей исполнена, о немже коротко. И великий князь литовский присылает к своему брату, великому князю Василию Васильевичу, послом Якуба, своего писаря, да с ним Ивашенца о том, чтобы Григория прияти им собе митрополитом. Благоверный же князь великий Василий Васильевичь и сын его, благоверный князь великий Иван Васильевичь, никако же не въсхотеша прияти таковаго врага бывша святей Церкви, Григория черньца, р[е]куще — волка, а не митрополита, и не прияли его. Аз же, смиренный митрополит, и со всеми сыновы и сослоужебники нашего смирения, со архиепископы Русскиа земля и со всеми епископы, вашею богодуховне братьею, церковными правилы, и со всеми Сборы святыя Церкви, иже в великом благочестии русскаго православия, вси дръжим богоотметнаго черньца Григориа отлученаго от святыя Церкве, и богомерзъска врага, и чюжа православныя веры, якоже и Сидора ересна, бывша прелестника великому благочестию святыя Церкве и всему православию Русския земля,— имже да въздаст Господь Бог в день Страшнаго суда по делом их. Нам бо есть, сынове, подвизание и попечение о сих имети, яко да таковыми ложными учители не будут въсхищени словесныя овца стада Христова. И благословляю вас, сынове и сослужебници нашего смирениа, да не приемлете от богомерзъскаго Григориа и послоушания ложных его словес. Аще начнет ученьем глаголати или писати к вам, да не послоушайте; аще ли запрещенье что делати начнет, вы же сих не внимайте; аще ли что напрасньством хощет развращенья, вы же не усумняйтеся по реченному в святом Евангелии Господню словеси: Не оубойтеся от убивающих тело, души же никакоже коснутися не могющих. И вы, сынове, якоже и мы, имейте богомерзъскаго того черньца Григориа отлучена от святыя Церкве. Вы бо есте, сынове, яко Божественнаго рая древеса доброплодная. Вам есть богопоручена, еже по святым правилом и по нашему благословению, церковная власть. Вы бо есте, сынове, богоизбраннии церковнии пастыри и учители; вам бо, якоже и нам, подобает пещися о управлении святыя си Церкви. И тако, сынове, дни бывше и облекшеся, якоже во броня, во истинную Христову правду и крепце подвигшеся по благочестии, имеюще Христова огнедухновенная уста, и приимше мечь духовный, еже есть слово Божие, и пребудете против духоборца, якоже твердии адаманти, отгоняюще богомерзъскаго черньца Григориа, святыя Церкве врага, и отсецающе его злыя плевелы неприязни — ложныя учения его, и мудръствующа беззаконнующая бездверья прелести уста его Божиею силою словес заградисте, угашающи пламень лютаго безбожья и сети неприязненныя злых его ересей размещете, а Божиа сила Отца и Сына и Святаго Духа помогает вам: Господь Бог с вами есть, никто же на вы. И тако, сынове, пребудете о Бозе, управляюще святую Церковь, и по святым правилом утверждающе веру православья, иже в Рустей земли восиявшаго благочестиа, и учений духовных словес напитеюще богособранное Христово стадо словесных овец своея паствы, зблюдающи от мысленаго волка Григориа и от всех враг навета непреклонно.

А благодать Божиа и милость и Пречистыя Его Матере, о Христе благословение и молитва нашего смирениа да пребывает с вами духовне всегда и днесь, Божиею волею, неразлучне. А писал на Москве августа месяца».

Форумы