Тропарь и молитва святителю Алексию, Московскому и всея Руси чудотворцу


Свт. Алексий Московский

Тропарь, глас 8

Яко Апостолом сопрестольна, и врача предобра, и служителя благоприятна, к раце твоей честней притекающе, святителю Алексие, богомудре чудотворче, сошедшеся любовию в память твою, светло празднуем, в песнех и пениих радующеся и Христа славяще, таковую благодать тебе даровавшаго исцелений и граду твоему великое утверждение.

Тропарь, глас 2 (Обретение мощей)

Яко сокровище пребогатое, многодетно в земли сокровенное, честныя мощи твоя обретошася чудоточащия, всеблаженне отче святителю Алексие: от нихже врачевство приемлюще, обогащаемся и Христа славословим, глаголюще: слава прославляющему святыя Своя.

Молитва

О священнейший отче, святителю Христов Алексие, пастырю и учителю наш, не отрини нас (имена), с верою притекающих к твоему заступлению, но скоро потщися помолитися Царю царствующих и Господу господствующих, да избавит стадо Свое от волков, губящих е, и всяку страну христианскую огради и сохрани святыми твоими молитвами от мирскаго мятежа и труса, нашествия иноплеменник и междоусобныя брани, от глада же и губительства, потопа, и меча, и огня, и напрасныя смерти, и якоже исцелением от слепоты царицы агарянския спасл еси отечество твое, тако помилуй и нас, умом, словом и делом во тьме греховней сущих, и избави нас гнева Божия и вечныя казни, яко да твоим ходатайством и помощию, Своим же милосердием и благодатию, Христос Бог тихое и безгрешное житие даст нам пожити в веце сем и на Страшнем судище Своем сподобит деснаго стояния со всеми святыми. Аминь.

Форумы