Молитва пред Виленскою чудотворною иконою пресвятой Богородицы


Собор Свято-Духова монастыря

О всемилостивая Госпоже, Царице Богородице, от всех родов избранная и всеми роды небесными и земными ублажаемая! Воззри милостивно на предстоящия пред святою иконою Твоею люди сия, усердно молящияся Тебе, и сотвори предстательством Твоим и заступлением у Сына Твоего и Бога нашего, да никтоже отыдет от места сего тощь упования своего и посрамлен в надежде своей, но да примет кийждо от Тебе вся по благому изволению сердца своего, по нужде и потребе своей, во спасение души и во здравие телу. Моли, Милосердая Владычице, пренебесного Бога, да присно церковь Свою Святую соблюдет, вышним своим благословением архиереи наша православныя укрепит, миром оградит, и Святей своей Церкви целых, здравых, честных, долгоденствующих и право правящих слово своея истины дарует, от всех же видимых и невидимых враг, со всеми православными христианы, милостивно избавит, и во православии и твердей вере до конца веков непоступно и неизменно сохранит. Призирай благосердием, Всепетая, и призрением милостивого Твоего заступления на град сей, святую обитель сию, храм сей и духовный вертоград зде сущий, и на сия богатыя Твоя милости неоскудно изливай, Ты бо еси всесильная Помощница и Заступница всех нас. Приклонися к молитвам и всех раб твоих, ко святей иконе твоей зде притекающих, услыши воздыхания и гласы, ими же раби Твои молятся на святем месте сем. Аще же и иноверный, и иноплеменник, зде преходя помолится, услыши, Чадолюбивая Госпоже, и сего человеколюбне, и милостивно соделай, яже к помощи  ему и ко спасению. Ожесточенныя же и разсеянныя сердцы своими во странах наших на путь истины настави: отпадшия от благочестивыя веры обрати и паки святей православней кафоличестей церкви сопричти. В домех людей Твоих и во братии святыя обители сея мир огради и соблюди, в юных братство и смиренномудрие утверди, старость поддержи, отроки настави, в возрасте совершеннем сущия умудри, сирыя и вдовицы заступи, утесненныя и в скорбех сущия утеши и охрани, младенцы воспитай, болящия уврачуй, плененныя свободи, ограждающи ны присно от всякого зла благостию Твоею, и утеши милостивным твоим посещением и вся благодеющия нам. Даруй же, Благая, земли плодоносие, воздуху благорастворение и вся яже на пользу нашу дары благовременныя и благопотребныя, всемощным твоим предстательством пред Всесвятою Живоначальною Троицею, в Ея же храме предстоим вси, нам помогающи. Прежде отшедшия отцы и матери, братию и сестры наша, и вся от лет древних ко святей иконе твоей сей припадавшия, упокой в селениих святых в месте злачне, в месте покойне, идеже несть печаль и воздыхание. Егда же приспеет и наше от жития сего отшествие и к вечней жизни преселение, предстани нам, Преблагословенная Дево, и даруй христианскую кончину жития нашего безболезнену, непостыдну, мирну и святых тайн причастну, да и в будущем веце сподобимся вси, купно со всеми святыми, бесконечныя, блаженныя жизни во царствии возлюбленного Сына Твоего, Господа и Спаса нашего Иисуса Христа, ему же подобает всякая слава, честь и поклонение, со Отцем и Святым Духом во веки веков.
Форумы