О древних канонах Северным святым (комментарий в русле истории)

 Святой Трифон Печенгский
Святой Трифон Печенгский

Житие преподобнаго Трифона Печенгскаго, просветителя лопарей

Предисловие

В истории просвещения лопарей замечательны два подвижника-благовестника, — воспитанник Соловецкой обители инок Феодорит, бывший потом архимандритом Суздальскаго монастыря, и основатель Печенгской обители преп. Трифон [1]. Феодорит просветил св. крещением лопарей, живших на реке Коле (в Архангельской губернии), научил их письменам и перевел на их язык несколько молитв; Трифон проповедывал Евангелие лопарям, жившим еще далее к Северу за Колою, на реке Печенге, у Норд-Капа. Оба они трудились в одно время (в первой половине XVI в.); но до какой степени апостольские и пустынножительские труды одного из них были соединены с трудами другаго, определить трудно. Курбский, рассказывающiй о трудах Феодорита, говорит, что Феодорит, прибыв на реку Колу, встретил там одного старца пустынника, пришедшаго сюда за пять лет до него, и прожил с ним двадцать лет, но называет этого старца не Трифоном, а Митрофаном, прибавляя однакож, что ему только так помнится (памятамися) [2]. С другой стороны, в житии преп. Трифона, не вполне впрочем дошедшем до нас, как увидим ниже, упоминается также один старец, с которым Трифон приходил в Москву за милостыней: и хотя не называется по имени, однакожь с вероятностию можно полагать, что этот старец был упоминаемый в сказаниях Курбскаго Феодорит. Кроме этого намека, в житии Трифона нет других указаний на Феодорита, и Трифон изображаетея в нем как самостоятельно действующий просветитель лопарей и основатель Печенгскаго монастыря. Преподобный Трифон скончался 15 декабря 1583 г. Когда написано предлагаемое здесь житие его [3], определенно сказать нельзя. Неизвестный составитель его, в своем послесловии к нему, говорит: «егда Божиим попущением, грех ради человеческих, Святыя Троицы и праведнаго обитель от немец разорена и созжена (бысть) до основания, в то время житие святаго, самовидцы писанное, погибе и доселе в земли забвения и неведения посыпахуся... у некоторых ко святому по вере, в малых книжицах и в писаниях кратких соблюдошася. Се ныне, Господу поспешествующу, понудихся службу и житие преподобнаго, во едину книгу совокупив, написати». Следовательно это не полное житие, писанное самовидцами, а только некоторыя сведения о житии и чудесах, уцелевшия в записках его благочестивых почитателей. Житие действительно не обнимает собою вполне всей деятельности преподобнаго, как просветителя лопарей и как пустынножителя, основавшаго Печенгскую обитель. Оно состоит из отдельных рассказов с особым в начале каждаго предисловием, а иногда и обычным заключением. Первая часть жития, состоящая из рассказа о просвещении лопарей и устроении обители, написана довольно стройно; но дальнейшие рассказы и особенно рассказы о чудесах излагаются растянуто, без связи и последовательности исторической и, по всей вероятности, в том самом виде, в каком они найдены были в тех «малыхь книжицах и писаниях кратких», на которыя указывает составитель жития.

Не смотря однакож на эту неполноту и отрывочность жития, общий характер преподобнаго, как благовестника и пустынножителя, в нем обрисовывается весьма ясно. Как бы предчувствуя, что со временем потребна будет ему в жизни вся крепость тела и неустрашимость духа, он с малых лет старался укрепить себя в трудах и опасностях, и для того постоянно удалялся в пустынныя места, пренебрегая холодом и зноем и разными «пустынными страхованиями», ужасающими неискушеннаго человека. Необыкновенно груба и дика была та страна, которую Промысл назначил ему для оглашения Евангелием: — это «гористыя и блатныя непроходимыя места», на которых жилища человеческия разсеяны были на разстоянии ста верст и далее одно от другаго; только временно приезжали сюда отважные промышленники для рыбной ловли. Еще грубее были обитатели, населявшие эту страну — лопари, жившие подобно диким зверям, «в самом поганском идолобесии; они боготворили гадов и ночных нетопырей и иных животных, и ели всякое нечистое и скверное». Неприязненно они приняли благовестника, особенно их «кебуны», или жрецы, постоянно преследовали его, несколько раз били и угрожали убить, если он не оставит их. Но с величайшим самоотвержением благовестник терпел все и продолжал проповедывать, пока наконец не обратил их ко Христу. Не имея сана священства, он потом должен был отыскивать священника для того, чтобы крестить новообращенных, и зодчих, чтобы построить для них церковь. Устроив церковь, он вскоре устроил и монастырь, старался обезпечить его благосостояние на будущее время, и для того отправился в Москву, ходатайствовать о нем пред царем, а во время случившагося голода, он как нищий и странник, в продолжении осьми лет, ходил из города в город, и все, что успевал собирать, отсылал для пропитания своей братии. Сколько для всего этого нужно было иметь любви и самоотвержения! Трогательно предсмертное поучение Трифона своей братии, все проникнутое тою любовию, которая одушевляла всю жизнь его: «не скорбите братия моя; Ииисус Христос и Бог мой, мене единаго во всех приключшихся злых моих, не остави, кольми паче, во имя святое Его вас собранных, не имать оставити; аз же заповедаю вам: любите Его, в Троице славимаго, всем сердцем и всею душею своею и всею мыслию своею; чадца моя, любите друг друга».

Житие преподобнаго отца нашего Трифона Печенгскаго чюдотворца, лопарский народ просветившаго святым крещением

Моисей великий во пророцех, и законодавец возлюбленный Богом и человеки, открывый дно морю, и безводную землю напоивый водою, иная многая чюдеса соделавый, написавый деяния прежде бывших святых мужей, не оною премудростию от Египта взятою, но благодатию с небеси данною: откуду бо можаше уведати Авелеву добродетель, СиФово доброзрачие и премудрость, Енохово угождение, Ноеву правду, Мельхиседеково благочестное священство, Авраамово возвание, веру, мужество, страннолюбие же и сына на жертву вознесение, иных благонравных подвиги, победы провозвещение? Оттуду же дар премудрости восприят, изрядный учитель Ииисус Сирахов, о таковех же беседует сице: восхвалим убо мужи славны; вси сии в родех препрославлени быша, и во днех их похвала; премудрость их исповедят людие, и похвалу их возвещает Церковь [4]. И аз от вседаровитаго Господа Бога моего Иисуса Христа молю помощи, да послет свыше Духа своего Святаго, усердно желающему, во благовестии трудившагося пустыннаго жителя и великаго в чюдесех преподобнаго отца Трифона житие и подвизи описати, да яко закон некий предложу прежде бывших и сего блаженнаго отца по стопам шествовати вожделеющим, по Павлу глаголющему: взирающе на их жительство, подражайте вере их [5].

Сей святый великий проповедник и пустынный житель преподобный отец Трифон рождение и воспитание имея в новгородских пределех, от самого ли Нова града, или от иных новгородцкия страны градов и весей, того в писании не обретаем; глаголетжеся от некиих, якобы отечество преподобнаго близ града Торжка, от освященных благочестно живущих родителей. Блаженный же измлада взирая на праведное пребывание родителей своих, подражая благочестию их, от юности своея изряден постник, кроток, милостив, о рекших ему пойдем во храм Господень, веселяся духом и радуяся сердцем, течаше ко храму, дабы ему обрестися первому. И тако церковное божественное семя паде в добрую бразду, в его благое сердце. Некогда слыша на утрени поющих: пустынным живот блажен есть, божественным рачением воскриляющимся, от того часа возлюби преподобный пустыню, начат моления ради от родителей отлучатися по непроходным местам, не радя о зиме и зное, и о иных пустынных страхованиих. Родители же стужаху ему, но не можаху от таковаго его добраго намерения запяти: понеже горяше огнем божественныя любве паче рождьших его. Некогда преподобному отцу, ходящу по пустыни, яко птице особящейся, внезапу бысть глас: иди и возопи помянухся есмь милуя вас, и любы обручения моего не посеется, пойди в землю не обетованную и не в путную, в землю жаждную, понеже не исходил муж, не обита человек. Святый же, слыша глас, убояся зело, глаголя: кто есть Господи? И паки глас: Аз есмь Иисус, егоже ты в пустыни сей ищеши. Святый же отвеща: Владыко Господи, невежда есмь и мало книжен. И паки глас: не мози глаголати вопреки пичтоже, яко на вся послю тя, идеши, и вся, елико яже повелеваю тебе, глаголеши; не убоися, яко с тобою есмь. От того времени начат святый паче прилеплятися Богови и посещати церковь святую Его; по пении же церковнем, на моление отлучашеся в пустыню. И пачат разсуждати, что есть земля жадная и непроходная; и непроходная ли сущая земля, или язычестии народи, жаждущия евангельския тайны благовестия? И оставив свое отечество, пойде, аможе наставит его Бог, еще в мирском чину, и прииде на приморие великаго моря окияна, в часть Норваньския [6] земли, в Кольской присуд, на реку Печеньгу, в народ лопарьский. Ибо та Норваньския земли часть святем народом издавна прилучена к новгородцкому владению, а по пленении великаго Нова града присовокуплена под державу великих царей московских и росийских самодержцев. Преподобный же отец Трифон в той непроходной дальней стране бе един пришлец, Владыке своему Господу Иисусу Христу, наземли странствовавшу, не имущему, где главы подклонити, подражая, окрест выше писанныя реки Печеньги, бездомно и безкровно, по лесам и по горам и в пропастех земных скитаяся, странствуя. В пустыни безчисленно прият от бесов и оть всяких пустынных страхований спасению своему и проповеди препятия; но все то приключившеся ему, яко добрый стрададец, претерпе мужественне; неспрестанно во слезах и молитвах и в сокрушении сердца пометая себя о землю пред Богом; един ко единому Владыце своему беседуя, глаголя сице: любы Твоя Божия да изжденет страх, и паки: скажи ми Господи путь, воньже настави десница Твоя. Тоеже земли вышепомянутый народ лопарский, живуще в нечестии и в самом поганском идолобесии, яко звери дивии, почитаху бесов, а кланяхуся делу рук человеческих и боготворяху гады и нощные нятопори, и иные ползущие животные; и ядяху всякое нечисто и скверно; а жилища своя имяху по гористым и блатным и непроходным местом разсеянны, един от другаго верст по сту и больши. А всей той земли в долину стадий пять сот, а поперек мало меньши. Но что святый благовестник и странник Христов преподобный Трифон еще прежде иночества чистым сердцем, истинный инок духом умысли близ той реки Печенги обретающимся ту лопарям начат якобы творити беседы о куплях. А потом, разумея духом просвещенным, показа им дивный всех просвещающий камень — Господа Иисуса Христа, и пребезценное сокровище — Его святую и предражайшую кровь, излиянную за искупление всех. Таже начат любезно сказывати о слепоте их и о диявольском омрачении; а потом дерзновенно обличаше и сказываше о истинном в Троице славимом Бозе, и о создании мира, и о потопе, и о разсеянии языков, и о Аврааме; понеже Авраам от такова же неведения позна Бога. Таже от Моисеева закона о пророцех и о псалмех, провозвестивших пришествие Сына Божия, и о Его воплощении, и о страстех, и о смерти, и о воскресении, и на небеса о вознесении, и о седении одесную Бога и Отца, и о общей смерти, и о воскресении, и о безконечном царствии, и о муце всех человек. Народ же, омраченный неведением, а паче из них кебуны, то есть отлученныи слуги диявольския, пряхуся с праведником Божиим, и яряхуся яко звери, и не исповедимыя деяху ему пакости: за власы торгаху и о землю метаху, и бияху, и пхаху, называюще незнаема странника, и юрода, их поганскому беззаконию возвещающа противное, вопльствующе нань, аще от предел их не изыдет и пребывати с ними будет, горкою мукою и самою смертию претяше. А иногда на Божiя проповедника, яко на самого Иисуса Христа иудеи, тако собравшеся со оружием и дреколием, глаголюще к себе: пойдем убием его, ибо поносит нам о падении в беззаконие, и обличает грехи наша. Но Господь Бог, обещавыйся с ним быти, весть преподобнаго своего от напасти изимати, желающих его крови и смерти. Многократно от руку их сицевым образом спасе: своим Божиим мановением наставляше преподобнаго сокрыватися в горах и в разселинах каменных; иногда святый прохождаше сквозе их, но злобою ослепленных, невидим бысть; а иногда показовашеся им и о диявольском пленении и о омрачении, не обинуяся, обличаше и сказоваше о царствии Божии; ибо Той един царствуяй всеми. Народи же, едини, изо уст его яко светлость огня видевше исходящую, дивляхуся, и на лице его святое, яко на лице ангела, прилежно зряще, начаша сердца своего жестокие бразды мягчити, и от преподобнаго сеющее(ся) божественное семя приимати; друзии же, яко львы, на благовестника Христова рыкаху и, яко медведи, ревуще, и различно страшаще, и зубы скрежетаху нелепо кричаще: возмем и распнем его. Ощутившии же в сердцах своих семя благовестия вопреки глаголаху: не имамы в нем вины; глаголет нам о добре, возвещает о царствии Божии, смерть нашу нарицает сон, сказует сице: вси не успнем, но воскреснем; оставим его ныне; аще ли вину обрящем, тогда безлепотною смертию убием его. И изгоняху преподобнаго, яко хулителя беззаконныя слепоты их. Преподобный же от сонма их изхождаше радуяся, яко проповеди ради имени Иисус Христова восприял многое биение и безчестие.

В том благовестии святый муж добраго желания потрудися не мало лет. Но Господу Богу поспешествующу, прежде лопарей окрест рек Печенги и Назреки, а потом тоя части всех проповедию огласив, но святым крещением не просветив, понеже не имел преподобный иерея. И оттоле обратися к Нову граду, и у архиепископа взя благословенную грамоту, и паки прииде на реку Печенгу, и приведе с собою церковных здателей, и начат строити церковь во имя Святыя и Живоначальныя Троицы. Сам же преподобный, в нощех в непрестанных молитвах пребывая, во днех за три поприща на рамех своих на церковное строение бревна и тес и иное потребное ношаше; новоприемших же святую веру словом евангельскiя правды утверждаше, да пребудут в них научени. По совершении же, та святая церковь некиим Божиим смотрением пребысть три лета. По трех же летех прииде преподобный в волостку Колу, тогда бо та волостка малое име поселение, из руских мест новопришельцы, и воеводы не обретахуся. И тамо, Божиим строением, нечаемо, обрете иероинока, именем Илию, и взят с собою паки прииде на реку Печеньгу, идеже во имя Живоначальныя Троицы построена церковь. Ту святую церковь иероинок Илия освятив; и лопарей, ихже преподобный отец Трифон породи словом проповеди, тому иероиноку повеле просветити святым крещением. И от тогоже иероинока Илии преподобный отец наш Трифон духом и сердцем правый инок и знаменоносец [7]. Новопросвещеннии же народи лопарьские от усердия своего, от имений своих приношаху сребро и вещи, и яко пред ногами апостольскими, преподобнаго отца Трифона при ногах полагаху. Инии же земли, и езера, и реки, и к морским угожие воды подаваху, и письменными заветы утверждаху. Блаженный же, от юности единою обнищавый Христа ради, ничто себе взимая, но вся отдаяше во церковь Святыя Троицы, и повелеваше за то подаяние, живых о здравии, а усопших о упокоении, Бога молити, и имяна их в синодики писати. И от того времени Пресвятыя и Живоначильныя Троицы святая обитель благодатию Божиею и первоначальника преподобнаго отца Трифона молитвами стала распространятися. И мнози от стран российских иноки и бельцы ко преподобному начаша приходити. Новопросвещеннии же людие и их наследники Богом утверждени во святой вере и до сего времени пребывают неподвижно, и яко на благодатный закон самаго Духа, и на проповедь святых апостол, тако и на своего начальника веры, на преподобнаго отца Трифона, уставы зряще, и последствующе преданию его сохранно и твердо. И от тамо блиских стран от лютерския и калвинския ереси, и от раскольныя слепоты блюдут себе невредно и, яко противным правде, зело гнушаются. Сицевы преподобнаго отца нашего Трифона во святей проповеди болезни и труды, и пустынныя поты, и подвиги. Егоже молитвами, в Троицы славимый Господь Бог, во православии цветущих нас християн, от бед и зол и от всех грехов наших да избавит, и падших на стезю покаяния и спасения наставит. Емуже слава и держава, честь и поклонение ото всех родов, в безконечныя веки веком, аминь.

О хожденiи преподобнаго ради милостыни во царствующий град Москву

Во дни благочестиваго царя и великаго князя Иоанна Васильевича, всея России самодержца, пойде преподобный отец Трифон во царствующий град Москву милостыни ради. И прежде пришествия его в Москву за един день великий царь ис полат своих пойде в соборную церковь святаго Успения Богоматере к литоргии; явишася ему на пути два святолепна инока; царьские же очи возлюби их честное явление, и вопроси: откуду есте вы? они же цареви рекоша: един монастыря соловецкаго, другий кольского уезду начальник святыя проповеди лопарьскаго народу, и строитель церкви Живоначальныя Троицы, что на реке Печенге, смиренный Трифон. Со царем приключившиися боляре и иных чинов тамо бывшии царьский глас слышаху, и царя глаголюща видеша, но с кем, тех не видяху, ни гласа их слышаху, вопросити же царя не смеяху; и тако царю явльшиися невидими быша. Во другий день таковым же образом иде великий царь во церковь к литоргии же и с ним сын его, праведный царевичь Феодор Иоанновичь всея России. Святый же отец Трифон со едино путным своим, соловецкаго монастыря с некиим праведным же иноком, два стаста пред царем, и подаху челобитныя своя. Царь прият во своя руце и ста, прочет моление их, рече им: видех бо вчера вас, и се ныне иду к божественей литоргии. И пойде царь во церковь. Благоверный же царевичь тоя соборныя церкви пойде в особый предел, якобы хотя изменити одежду и одеяся во ину, призва к себе некоего от ближних, и глаголаше ему: пойди и отдаждь, в нейже идох путем, одежду мою странному иноку Трифону, и рцы ему: благоверный царевичь посла к тебе свою одежду, да ускорит его милостыня прежде всех, он же сию одежду престроит во одежду священную; вижду бо его мужа праведна. Посланный же повеление исполни. Преподобный же Трифон прият толь драгую и честную милостыню, благодарив Бога, в Егоже десницы сердце царево и сына царева. По исшествии же царь во своя царьствующия палаты, сед зболяры, повеле странных иноков чести челобитные, и сказываху боляром, како ему овии страннии явльшася вчера и в нынешнем дни били челом; и начат советовати, чим бы их пожаловати. Боляре же цареви глаголаху: се днесь их видехом, вчера никакоже. Царь же рече: аз с ними глаголах довольно, вы ли не видесте. Сигклит же отвеща: глас твой слышахом иноков же отнюдь не видехом, ни гласа их слышахом. Тогда великий царь сих блаженных праведников повеле сыскати, и пред своим царьским лицем поставити. Посланнии же странных приведоша пред царя, вопрошающи: вы ли вчера глаголаху со царем? Они же отрекахуся, глаголаху сице: ни, великий царю, вчерашнаго дни и царьствующаго града не постигохом; многими свидетельствуемся, яко сего дни приидохом. Царь же и боляре удивльшеся зело о таковех потаенных рабех Божиих. И оттоле великий царь возлюби их, а паче преподобнаго Трифона, и пожаловав его и одарив обитель колоколами и церковною утварию богато, отпусти с милостивым призрением. И прииде преподобный морем в обитель свою, носяй милостыню довольну, здраво. И прият бысть от учеников, от всех иноков и от новопросвещенных честно.

О звери, сотворшем преподобному пакость

Бог и премудрый Содетель сотвори человека, и постави его над всеми властелина, яко читаем в книзе Бытии, обладати рыбами морскими и зверьми. Но по преступлении Адамли, от послушания его зверие отторгошася, и оттоле начаху не повиноватися, токмо избранным святым, любящим Бога. И убо праведному Ною о повиновении зверев извествуется во истории: всяк зверь прииде и иде к Ною в ковчег. Читаем и о Самсоне: и се лвичищ, ревый противу ему, и сниде нань Дух Господень, и восхити льва и разтерза, яко козлища. Но в книзе Царств от глагол Давыдовых повествуется: егда пасох аз овцы отца моего стада, и егда прихождах лев, или медведица и восхищаше от стад овцу едину, и аз во след его изхождах, и поражах, и исторгах из уст его взятое; и аще сопротивляшемися, то ем за гортань его, и разбивах и умерщьвлях. Но святый пророк Иелисей от Ерихона возвратися в Вефиль; тамо зверие послушаху его. Писано тако: и входящу ему путем, и се дети малы изыдоша из града, и ругахуся ему, и реша ему: гряди плешиве, гряди. Озревся вослед себе и виде ю и проклят я именем Господним, и се изыдосте две медведицы от луга и расторгоша я от них четыредесят два отрочища. Но повиновашеся зверие и святому пророку Даниилу; извествуется сице: сии же ввергоша в ров левск, и пребысть шесть дний и обретеся жив [8]. Но в новой благодати в житиях святых и паче изобретаем, им же служаху и повиновахуся зверие. И терпевшим Христа ради гонение дивия еленицы и серны из дебрев приходящим я дояху млеко. И не точию самим Христовым рабом, но именем их заклинающим служаху зверие. Но оных число превосходящих повестем зде описати не возможно. Ныне во славу Святыя Троицы преподобному Трифону о повиновенiи гневливаго зверя приличествует помянути. Преподобному Трифону в келии своей устроившу квашню ко испечению хлебов, и некия ради потребы изыде из келии; тогда в келию его прииде великий медведь, опроверже квашню и пачат угогованное тесто ясти. Святый же прииде к келии и виде зверя, глаголя к нему: Иисус Христос, Сын Божий, Бог мой повелевает ти, изыди из келии и стани семо кроток. Зверь же изыде пред ногами преподобнаго ста недвижим. Преподобный же взя велие древо, бияше зверя, рече: во имя Иисус Христово даю ти многи раны, яко грешному. И наказав, завеща зверю близ келии и лавры впредь не пакостити, и отсла в пустыню. От того же времени в славу Святыя Троицы и во знамение чюдеси преподобнаго, окрест лавры и келий его, монастырским скотом и еленем в пустыни безстрашно пасущимся, и доселе звери не пакостиша.

О ношении жерновных каменев из Колы во обитель старопеченскую

Преподобный отец наш Трифон, во граде Коле купи жерновы ручные немалы и тяжкия, изволив те жернова на рамех своих во обитель нести. Ученицы же молиша преподобнаго, да не трудится излично [9]. Преподобный же рече им: братия моя! непраздньство велие создано бысть всякому человеку, иго тяжко на сынех адамлих от дне исхода от чрева матере их до дне погребения в матерь всех. Таже святый, помяну Спасителем реченное, глагола к себе: уне бо тебе, Трифоне, на выи своей обесивый осельский камень носити, нежели братию праздньством [10] соблажняти. И взя оныя жерновы на своя рамена и во обитель Святыя Троицы, что у реки Печенги, от града Колы сто пятьдесят стадий, путем блатным и гористым, отнесе, и в уреченном месте устроив. Те же жерновы преподобнаго трудов во истинное свидетельство и доныне пребывают, и на братию мелют потребная. От достоверных же глаголется тако, якобы преподобный с бременем оных жерновов в пути идяше до выше реченныя обители в велицем посте, ни мало ядый.

О хождении преподобнаго в великий Нов град милостыни ради

Егда от Бога грех ради наших на страны и на грады посылаются различныя казни, в нихже причитается за велию язву и глад, яко изобретаем у Еремии: вси людие его воздышуще ищут хлеба, даша драгая своя в пищу [11]. Но царь и пророк Давыд за лютость глада таковыя отрицается казни, еже читаем во Царьствии: и избра себе Давыд смерть. Но всесильный Господь Бог, милосердый наш Отец и наказатель щедрый, в та злая времена верных избранных своих возтавляет, да пекутся и промышляют о загладневших домовных и о всех народех, и окормляют с добрым прилежанием. Праотец Исаак, глада ради, в Герару (иде), и тамо жену свою Ревекку и весь дом препита. Извествуется сице: посея тамо Исаак и приобрете в то лето стократный плод ячменю. И целомудренный Иосиф весь Египет и иные страны, и отца и братию свою, во время глада, прекорми. Пишет тако: отверзе Иосиф вся житницы и продаяше всем египтяном, и вся страны приидоша во Египет купити ко Иосифу, обдержаше бо глад и всю землю. И идоша ко Иосифу купити пшеницы во Египет. Но странная иноплеменная Руфь на Воозове ниве за труды жатвенные уроку что имаше, тем питаше свекров свою Нееминь. О ней же повествуется: иземши Руфь от недр своих и даде свекрови своей, еже бе оставила, от нихже насыти. Давыда со отроки иерей Авимелех во алчбе напита; ибо во истории Царств читаем: и даде ему иерей Авимелех хлебы предложенныя. Но и преподобный отец наш Трифон древним промышлеником и прекормителем гладных уподобися, молитвами своими и многолетным странным прошением препита свою обитель, образом сицевым. Во всем помории бяху велий глад, понеже многие годы овощие и хлеб побиваху мразом. Преподобнаго же во обители братии иноков и мирских умножися, а хлебная имехуся великая скудость. Но душ и телес промышленик, добрый преподобный отец, взя с собою некоторых от братий, отидоша во страны великаго Нова града, и пребысть тамо нищ и проситель, от града во град, и от веси в весь странствуя, и что испрошаху милостыни, в монастырь свой на препитание братий посылаху, и яко кокош собирая семена птенцев своих окормляху все целыя осмь лет. Тамо же преподобный чюдес врачь обретеся, во славу Христову имени, множество душевно и телесно болящих исцеляше; но по единому в писании исцелений его не обретаем [12]. И егда мину злоключение недородных лет, прииде преподобный во свою обитель на реку Печеньгу. Игумен же и братия о пришествии его славяще Святую Троицу, и многолетнаго во гладе препитателя своего преподобнаго отца Трифона благодарствоваху.

Месяца декабря, в 15 день. Преставление преподобнаго отца нашего Трифона Печенгскаго чюдотворца

Преподобный отец наш Трифон, по проповеди Христове, и по многих своих пустынных трудех, в старости мастите, во обители своей впаде в болезнь и изнеможе зело. Приидоша же к нему игумен и братия и вси ученицы его, видевше его великою болезнию одержима, о таковем пречюднем отце и наказателе своем начаша скорбети горко, глаголюще: почто наставниче наш оставляеши нас сирых! Святый же рече: братия моя не скорбите, и в добрый путь течения моего не пресецайте; все упование свое возложите на Бога; ибо Иисус Христос и Бог мой мене единаго во всех приключшихся злых моих не остави, кольми паче во имя Его святое вас собранных не имать оставити. Аз же заповедаю вам: любите Его, в Троицы славимаго, всем сердцем своим, и всею душею своею, и всею мыслию своею. Чадца моя: любите друг друга. Иночество честно и воздержно храните, начальства [13] бегайте. Весте мя: се от многих лет не моему, но и вашему требованию послужисте руце мои, и всем бых послушник. И паки молю вас, о отходе моем не скорбите. Смерть мужу покой; всякого бо человека душа отвнеуду приходит в тело мертвенное яко странник и неколико пребывает, по мале же тело вменяется в прах; ибо мы вси гной, и сын человеческий червь, но разумная душа отходит во свое отечество, отнюду же прииде. Любимицы мои, подщитеся тамо, идеже нест смерти, ни тмы, но вечный свет: тамо день един паче тысящ. Не любите мира и яже в мире; сами бо весте, колик окаянен мир сей яко море неверен, мятежен, пропастей пакостьми (?) нечеcтивых духов, ветрами волнуется губительно, лжами горек, наветы диявольски трясется и пенится, грехами веяния свирепствует и смущается, о погружении [14] миролюбцев тщится; всюду плачи, пагубы своя простирает, а наконец вся смертию осужает. Еще заповедаю вам: егда по воли Божией душа моя разлучится от тела моего, погребите мя у церкви Успения Пресвятыя Богородицы, в пустыни, идеже часто отхождах на богомыслие и молчание. Потом же преподобный прият Христа Бога нашего пречистое и животворящее тело и святую Его кровь. По приятию же седе на обычной своей рогозине, уже конечно изненоже, прослезися. Игумену же вопросившу: преподобне отче, нам о тебе скорбсти заповедаеши [15], и ко сладкому Иисусу грядеши с радостию, повеждь, чесо ради прослезися? Святый рече; на сию святую обитель будет искушение и от острея меча умучатся мнози; но не ослабевайте братия моя; уповайте на Бога; не оставит бо жезла грешных на жребии своем; силен бо, и паки обновит обитель сию. По изречении же оном, ляже на рогозине своей и просветися лице его, мало осклабися, предаде святую свою душу Господеви. И погребен бысть в завещанном месте, в пустыни, идеже и до ныне пребывает, а душею же во гражданстве небеснем, идеже сыны Бога живаго вси святии. От гроба же преподобнаго силою Божиею с верою приходящим неоскудное изцеление подавается, и на исусе и на море, в бедах, и в потоплении призывающим его скорый помощник и избавитель показовашеся. Родися же преподобный 7003-м [1495] году во княжение великаго князя Иоанна Васильевича; прежив всех лет 88; преставися 7091 [1582] году, декабря 15 день, в царство царя и великаго князя Иоанна Васильевича, всея России самодержца. Возрастом святый не мал, нагиб, плотию крепок, мало плешив, брадою сед, Святей Троице теплый служитель и Пречистей Богоматери благодарен.

О спасении великаго царя Феодора Иоанновича от злаго замышления свитских [16] немец

Царю и великому князю Феодору Иоанновичю самому воевавшу великии инфлянты [17], то есть страны ливонския земли, и обшедшу некий град, и окрест града того царь великий положися обозом неподалеку и поставиша шатры. Всезлобнии же и лукавии немцы, в нощи, хитрым своим коварством на обоз и на самый царский шатер нацелиша пушки. Царю же по трудех расправ воинских почивающу в шатре своем, явися ему восне инок благообразен лицем, глаголя царю: востани и изыди из шатра своего, да не напрасно убиен будеши. Царю же вопрошающу: ты кто еси? Святый же отвеща: аз есмь Трифон, емуже в милостыну даде одежду свою с таковым намерением, милостина твоя да ускорит прежде всех; того ради Господь мой и Бог, завещавый спасение царем, глаголет ти: ускори востани от ложа и изыди из шатра, немедли. Царь же убуждься и вскоре от ложа востав и из шатра изыде. Немцы же из нацелянных пушек начаша по обозом и по шатрам крепко стреляти, и едино ядро улучи в царский шатер и в ложе, на нем же почиваше. И о таковом чюдном сонном видении царь, благодарствуя Бога, возвеселился о спасении своем и вся сказа боляром, како спасеся. И посла посланных в обитель на взыскание преподобнаго. Посланнии же не обретше преподобнаго; уже бо преселися к вечным обнтелем. И от того времени великий царь име веру паче ко преподобному, и во обитель его посылаше многое потребное и на все владение даде царские милостивыя грамоты.

Преподобных отец в обители Живоначальныя Троицы в Трифонове Печенском монастыре избиенных от свитских немец

Всем год и время всякой вещи подсолнечной, время плакати и рыдати, глаголет премудрый Соломон. Друзи Иовли видеша любимича своего оструплена, возопиша гласом велиим и восплакашеся зело. Пророк Иеремия плакаше Иеросалима ради, в молитве своей к Богу вопльствует тако: помяни Господи, что бысть нам и виждь укоризну нашу [18]. Но пророк Иезекииль, от лица Божия глаголет: сыне человечь, воздохни сокрушением чресл твоих и болезнию воздохнеши [19]. И исполнитель закона, Иисус Христос, истинный Бог и человек, плакаше над Лазарем; но что глаголют жидове: виждь, яко любляше его. Вдова в Наине плакаше мертваго сына своего. Мария Магдалина сладкаго Иисуса плакаше тепле. Таковыя бо слезы не всуе проливаются, но есть истинныя любве ясно показание. Но и нам братие о избиении преподобных отец сея повести, сетованию приличныя, должно послушати сердечным желанием и со пристойным плачем. В нейже повествуется сице: великому царю Феодору Иоанновичу воевавшу свитцкие немцы; тогда же свитцкого владения Финские страны немцы приидоша на обитель Живоначальные Троицы приидоша ратию. В первых сожгоша храм Успения Пречистыя Богородицы, что преподобнаго над мощми; иероинока праведнаго Иону и служебника умучиша. Потом поидоша ко обители и не дошедше обители сокрышася в тайне месте. Но на обитель преподобнаго целыя седмь дней ратию дерзнути не смеяху. Показовахуся им на забралах ограды монастырския множество оружейнаго воинства. Но в самый праздник Рожества Христова, по благоволению судеб Его неиследомых, овии еретицы безвестно впадше во ограду, при концы святыя литоргии, и вне церкви во службах сущих иноков и мирских заклаша мечем. Потом лютие зверие во церковь вскочиша со оружием и во храме всех предаша смерти, и ради тяжчайшаго мучения овых на полы [20] пресекоша, другим нозе и руце отсекоша, инех вдоль разсекоша. Преподобнаго же игумена Гурия да диякона, казны ради, различне мучаще и оружием язвяще; и огнем жгуще; но доблии Христовы страдальцы в таковом лютом мучении еретиком ничто же отвечающе, токмо к небеси взираху. И то видеша окаанныи, яко ничтоже им о казне поведающе, паче разярившеся, мечами преподобных в части разсекоша, и храмы Божия оскверниша и ограбиша, и с посеченными преподобных телесы сожгоша. И всю обитель разориша до основания, возвращеся окаянныи во свояси, и в пути, в пустыни, заблудиша и огладнеша... [21] избивших преподобных в лавре, подобную погибель получиша молитвами преподобнаго отца нашего Трифона, изомроша от глада, мало что на возвещение погибели их во страну свою приидоша. Но острием же меча умроша тогда иероиноков, иеродияконов, иноков 51 человек, да слуг и служебников работных человек; во отшествии же в службах молитвами преподобнаго вси спасшеся. И собрахуся в разоренную святую обитель, о убиенных горек плачь сотвориша, и оставшия плоти разсеченныя, згоревшия части собраху и погребоша честно, и великому царю Феодору Иоанновичу о том разорении учиниша известно. Благоверный же царь слыша о том, зжалишася зело, и повеле, обитель построити в кольском остроге, идеже храм Пресвятыя Богородицы честнаго ея Благовещения. А егда град и монастырь згоре, повелением благовернаго государя царя и великаго князя Михаила Феодоровича всея России самодержца во (7)127-м [1619] году обитель построена близь града, за рекою Колою, и доныне милостию Живоначальныя Троицы и преподобнаго молитвами пребывает сохранно.

Многа ина чюдеса от гроба святаго на Иисусе и на море совершахуся, и ныне неоскудно подаваются с верою приходящим, благодатию Святыя Троицы и Пречистыя Богоматере, и преподобнаго Трифона молитвами, егоже и мы молим, да и нашим болезнем, телесным и душевным, своим теплым предстательством у Христа Бога испросит решения. Господу единому, премудрому, безначальному и непостижимому везде сый и вся исполняющему, в трех ипостасех от всей твари хвалимому, благоволившему мне недостойному дивнаго в проповеди, преподобнаго отца Трифона житие и подвиги во едину книгу собрати, благодарение и честь, и великолепие, славу и державу, и поклонение возсылаем ныне и присно в безконечныя веки веком. Аминь.

Примечанiя:

[1] Память преп. Трифона 15 декабря. Сведения о Печенгской обители в Истор. иерарх., т. I?, стр. 579- 585.

[2] Сказ. ч. 1, стр 167, 173-177. изд. 1833 г.

[3] Напечатано по списку казанской академической (бывшей соловецкой) библиотеки под № 188, Список XVII века в 8 д., и содержит вь себе кроме жития, еще службу преп. Трифону.

[4] Сирах. 44, 1. 7. 14.

[5] Евр. 13, 7.

[6] Норвежской.

[7] Вероятно пропущено слово: бысть или соделася, т. е пострижен в иноческiй чин.

[8] Дан. 6, 24.

[9] лично сам.

[10] праздностию.

[11] Плач. Иерем. 1, 11.

[12] Т. е. особых о каждом исцелении сведений не находим.

[13] властолюбия.

[14] о потоплении.

[15] запрещаешь.

[16] шведских.

[17] Лифляндию.

[18] Плач. Иерем. 5, 1.

[19] Иезек. 21, 7.

[20] по полам.

[21] Здесь очевидно пропуск.

(Источник: Памятники Древле-Русской духовной письменности: Житие преподобнаго Трифона Печенгскаго, просветителя лопарей. // Журнал «Православный собеседник», Казань. – 1859 г. – Книга II. – с. 89-120)

Ссылки по теме
Форумы